Madaxweynaha Yuganda oo ka qeyb galaya shir madaxeedka IGAD ee Muqdisho.

Madaxweynaha Uganda Yoweri Museveni ayaa ka mid ah Madaxda la filayo inay ka qeyb galeen shir madaxeedka Urur Goboleedka IGAD, kaasoo todobaadka soo socda ka dhacaya magaalada Muqdisho ee Caasimada Soomaaliya.

Magaalada Muqdisho ayaa markii u horeysay marti gelin doonta shir caalami ah muddo 30 sano ah, iyadoo Warbaahinta Caalamka ay xilli ugu yeeri jireen Caasimada ugu khatarta badan Caalamka.

Shir madaxeedka IGAD ee bishan ka dhacaya Muqdisho ayaa la filayaa in looga hadlo doorashooyinka ka dhacaya Soomaaliya bishan September iyo October, qalalaasaha siyaasadeed ee ka taagan Koofurta Sudan.

Madaxda kale ee la filayo inay Madaxweynaha Soomaaliya kala qeyb galaan shir madaxeedka IGAD ayaa waxaa ka mid ah Madaxweynaha Kenya Uhuru Kenyatta, Salva Kiir Madaxweynaha Koofurta Sudan, Ra’iisul Wasaaraha Itoobiya Hailemariam Desalgne, Madaxweynaha Sudan Cumar Xasan Al-Bashiir iyo Ismaaciil Cumar Geelaha Jabuuti.

“Waa markii ugu horeysay oo Muqdisho ama Soomaaliya lagu qabto shir heer sare ah muddo 30 sano ah, waxaan aragnaa inay tani fariin taariikhi ah u direyso Caalamka oo ah in Soomaaliya ay dib u soo laabatay”sidaas waxaa yiri Wasiirka Arrimaha Dibadda Soomaaliya Abdisalam Omer hadliye.

Illaa 22,ooo ciidamo nabad ilaalin ah oo ka socda dalalka deriska ah ayaa ku sugan Soomaaliya, kuwaasoo taageeraya dowladda Soomaaliya ee dagaalka kula jirta Kooxda Al-Shabaab.

 

 Mahad Mohamed Ali 

Qeybta Warqabadka Wararka.

Email: Mahat335@gmail.com